Sunday, August 19, 2018

ඇඹිලිපිටියේ බිලිබොයිලා ජාලිය ඈපාලා සහ බුද්ධිකලා

87/89 ජවිපෙ භීෂණය අපේ ප්‍රදේශයට තදින් දැණුනේ නැත.ඇත්තටම මා දැක තිබුනේ ටයර්මත පිලිසුන එක් සිරුරක් පමණි. එයද භීෂනය අවසන් යුගයේ ය. එහෙත් ඇඹිලිපිටිය වැනි ප්‍රදේශවල භීෂණය ඉතා දරුණුව පැවති බව අප දැණගත්තේ දිවයින පත්තරේ පලවූ භීෂණ යුගයේ කතා ලිපිපෙල මගිනි. ඇඹිලිපිටිය ප්‍රදේශයේ පාසලක සිසුන් පැහැරගෙන ගොස් ඝාතනය කිරීමේ සිදුවීම මා මහත් කණස්සල්ලට පත් කළ සිදුවීමකි. ඊට හේතුව විදුහල්පති වරයාගේ පුත්‍රයා සමග ලව් ලෙටර් එකක් සම්බන්ධ ප්‍රශ්නයක් දුර දිග යාමෙන් මේ මහා විනාශය සිදුවූ බව මේ ගැන කතා කළ හැමෝම කී නිසාය. ඇඹිලිපිටිය සිසු ඛේදවාචකය ගැන පළවූ ලිපි මා උනන්දුවෙන් කියවූයෙමි. එම සිදුවීමට අදාල චරිත වල නම් ද මතකයේ රැදුනි.

මේ පෝස්ට් එකට  මුල් වූ හේතුව ට්‍රාන්ස්ලිවේනියා බ්ලොග් එකේ පළවූ ලිපියකි. මා එහි කොමෙන්ට් එකක් දැමීමට සිත් වුවද සවිස්තරපෝස්ට් එකක් දැමීම වඩා උචිත බව පසුව සිතුවෙමි.ඇඹිලිපිටිය සිසු ඝාතන නඩුවේ චුදිතයකු වූ ජාලිය ඈපා මහතා සමග රුවන් ජයතුංග මහතා කළ සම්මුඛ සාකච්ඡාව ඉතා අගය කළ යුත්තකි. ජාලිය ඈපා මහතා හිටපු හමුදා නිළධාරියෙකුට එහා ගිය ජීවන දැකිමක් සහිතව එහි අදහස් දක්වා ඇත.


දිනක් ෆේස් බුක් එකේ සංවාදයකදී මා කොමෙන්ට් කරන අතරතුර එක් කොමෙන්ට් එක්ක් දැමූ අයෙකුගේ නම දැක කුහුලක් ඇතිවිය. ඒ නම මට පුරුදු නමක් නිසාය. ඒ අන් කවරෙක්වත් නොව ජාලිය ඈපාය. මා ඔහුගේ ප්‍රොෆයිල් එකට  ගොස් බැලුවෙමි. මට ඒ කාලෙත් ඔහු ගැන තිබුනේ ප්‍රසන්න හැඟීමක් නොවේ. ඔවු මේ ඔහුමය. පසුව ඔහු විවිධ සංවාදවලදී දැක්වූ අදහස් දෙස බලන විට මේ අහවලාමද කියා විස්මපත් වීමි.

ඇඹිලිපිටිය සිදුවීම ගැන වෙනත් මූලාශ්‍රවලින් ලැබුන තොරතුරු දෙස බලන විට මා මුලදී මෙම සිදුවීම ගැන දැරූ අදහස් මොනතරම් සාවද්‍යද කියා මට අවබෝධ විය. එම කාලයේදීම අපේ නගරයේ පන්සලක හාමුදුරුකෙනෙක් ප්‍රේම සම්බන්ධයක් නිසා ගැහ්ණු ලමයෙකුට පිහියෙන් ඇන වස බී මළේය. මේ සිදුවීම වාර්තා කරන්නට ගියේද ඇඹිලිපිටිය සිදුවීම ගැන ලියන මාධ්‍යවේදියාමය. මේ මොන බොරුද මේ පත්තරේ ලියල තියෙන්නෙ කියා අපේ ගෙවල්වල කතා වුනා මට මතකය. එම තරුණියගේ නම පවා මාධ්‍යවේදියා අතින් දමා තිබිනි. මේ මුද්‍රිත අකුරු ගැන මගේ ගරුත්වය අහිමි වූ යුගයයි.

ඇඹිලිපිටිය සිසුන් ගැන මොහු ලියූ ලිපිවලින්ම මේ සිසුන් ලව් ලෙටර් කේස් එකකට එහා ගිය අභ්‍යන්තරයක් සහිත අය බව පෙනේ.

ට්‍රාන්සිල්වේනියා ලිපියේ සදහන් මිනීමැරුම පවා සිදුකලේ යැයි කියන උදේෂ් නම් සිසුවා පවුල් අනුවද ජේවීපීය.
ඔහුගේ මව පුවත්පතට ප්‍රකාශ කරන්නේ ඇය වෙන දෙමවුපියන් මෙන් සුරංගනා කතා නොව අසාධාරනය හා අයුක්තියට එරෙහිව සටන් වැදුනු සැබෑ මවුවරු පියවරු ගැන දරුවන්ට කියා දුන් බවයි. මෙය වැරදි නැතත් අමුතු පවුලක් බව පේනවා නේද?
යම් දේශපාලන පසුබිමක් සහිත පවුලකි. ඇය දරු දුක නිසා ලේ වතුර වී මිය ගිය බව කියැවුන නිසා මෙම සිදුවීම පත්තරේ විශේෂයෙන් දක්වා තිබිනි.

මෙම සිදුවීමේදී ඇලෝසියස් ස්ටීවන් නම් සිසුවෙකු මියගියේය. ඔහු ට්‍රාන්ස්ලිවේනියා ලිපියේ සදහන් ස්ටීවන් ගේ පුත්‍රයාය.මොහු අසූව දශකයේ මුල ජවිපෙ මැතිවරණ වලටද සහභාගි වූ අයෙකි. අපි වගෙ නිර්ධන පන්තියෙ අයටම මේ කරදර මොකදැයි ඔහු පත්තරේට කියයි. උක්ත ලිපියේ නම සදහන් නොවූ මනෙක්ල නම් සිසුවෙක් ලියන්නේම රැඩිකල් කවිය. 
මෙම සිසුන් බහුතරක් ගුරු විදුහල්පතිවරුන්ගේ දරුවන් වීමත් 25% ක් පමන එක් දෙමවුපියෙක් අහිමිවූ අය බවත් තවත් වැදගත් නිරීක්ෂනයක් වෙයි. ත්‍රස්ත කල්ලි වෙත ඇදීයන්නට ඔවුන්ට බලපෑ හේතු අතර එම අඩුව නිසා ඇතිවූ මානසික තත්වයක්ද විය හැක. ත්‍රස්ත කල්ලියද පාසල් අඩපන කිරීමට විදුහල්පතිවරුන් හා ඔවුන්ගේ දරුවන් ආකර්ශනය කරගත්තාද විය හැක.

එසේම මෙම සිදුවීම ගැන මාධ්‍යවේදියා ලියූ පොතේ තිබෙන්නේ ප්‍රින්සිපල්ගෙ පුතා පිකටින් කළ බවය. අතුරුදන් වූ සිසුන් බයේ වෙව්ලමින් පොත් බෑග් ගෙන ගෙදර ආවාලු. ත්‍රස්ත සංවිධානයේ නමවත් සදහන් නොකෙරේ. සියලුම දේවල් ලව් ලෙටර් එක නිසාය.

ඇඹිලිපිටියේ සිද්ධිය ඇත්තටම ඛේදවාචකයකි. 71 කැරැල්ලට ගිය අය 99% ක් ම 89 කැරැල්ලට එක් නොවූහ. 89 දි ඝාතනය වූ අය සාර්ථක පුනරුත්ථාපනයක් කළානම් ඔවුන්  එලියට එන්නේ ත්‍රස්ත පක්ෂයේ ස්ථිරසාර විරුද්ධවාදීන් ලෙසය.

මෙම සිදුවීම නිසා ජාලිය ඈපා වැනි හමුදා නිළධාරීන්ගේ අනාගතයම විනාශ විය. ඔහු හමුදාවේ ඉහල තනතුරකට යාමට ඉඩ තිබූ නිළධාරියෙකි. එවකට පැවති රජයටත් හමුදාවටත් කැරැල්ල මර්ධනය කිරීම හැර වෙන විකල්පයක් නොවීය.

යළිත් මෙවැනි දේ ලොව කොතැනකවත් සිදුවීම වළක්වා ගන්නට මෙය හොද පාඩමකි. මෙහිදී අපගේ අධ්‍යනයට ලක්විය යුතු අංශ මොනවාද
එකක් නම් මෙම වයසේ දරුවන්ගේ කටයුතු ගැන දෙමාපියන් ගේ අවධානයයි. හදුවල සිදුවීම වැනි දෙමවුපියන් විසින්ම දරුවන් ත්‍රස්ත කල්ලිවලට යොමුකරන තත්වයකදී මෙය වලංගු නැත. එවකට ජවිපෙ හා එල්ටී ටීය පමනක් නොව ලොව සියලු ත්‍රස්ත කල්ලි අවුරුදු 16,17,18 සිසුන් ඉලක්ක කර ගනිති.අයි එස්  අල් කයිඩා ෂයිනින් පාත් වැනි සියලු කල්ලිවලට මෙය සාධාරණය. දරුවන් ට පුළුල් දැක්මක් නැත. ගල් කටස් එක ගෙන දැවැන්ත හමුදා යාන්ත්‍රනය ( ඉන්දියන් හමුදාවත් එක්කම ) පරාජය කළ හැකි බව කී විට මොවුන් චතුර වාග් ශෛලියට රැවටෙති. පිරිසක් අතරින් තෝරාගනු ලැබීම හා නගරයේ චන්ඩින් වීම මොවුන්ට මහා ආතල් එකකි. ජවිපෙ හා එල්ටීටීඊ ය උතුරේ හා දකුනේදී කළේ එකම දෙයකි. එන්ම බිලිබෝයිලා ඉදිරියට දැමීමය. මේ නිසා දරුවන් ගැන දෙමවුපියන්ගේ අවධානය වැදගත්ය. එසේම කුඩා කල සිටම ත්‍රස්ත කල්ලි ගැන දැනුම ලබා දීමද වැදගත්ය. ඕනෑම ත්‍රස්ත කල්ලියක් දුෂ්ට නායකයෙකු වටා බ්‍රමණය වේ. දුෂ්ට නායකයාට අවශ්ය විනාශය තුලින් ලබන ප්‍රසිද්ධිය හා අනුකම්පාවයි.

ත්‍රස්ත කල්ලි වලට පුද්ගලයන් සම්බන්ධවන්නේ අතීත ජයග්‍රහන ගැන පතුරුවා ඇති මිත්‍යාවන් නිසාය. රුසියානු විප්ලවයට ජර්මන් සහාය ලැබුනි
ජර්මනියට අවශ්‍ය වුනේ රුසියාව පලමු ලෝක යුද්ධයෙන් ඉවත් කර ගැනීමය.චීන විප්ලවයට රුසියන් සහාය ලැබුන කතා ඔවුහු නොකියති. වියට් කොන් ගරිල්ලන් ඇමරිකානුවන් පලවා හැරියේ චීන සෝවියට් සහාය නිසාය. චීන්නු වියට්නාම් යුද්ධයේදී සක්‍රියවම දායක වූ බවට සාක්ෂි ඇත.

මාත් එක්ක එකට ලුමුම්බා හිටිය කරුමේ සහෝදයා එක රැයින් විප්ලවය කළා ඇයි අපි බයවෙන්නේ කියා විජේවීර ඇසුවත් ඇත්තෙන්ම සැන්සිබාරයේ තිබුනේ කුඩා පොලිස් හමුදාවකි. මහ ඉහලින් කතාකරන විප්ලවවාදීන්ගේ වරක මදුල වන කියුබාවේ ද හමුදාව බැටිස්ටා විසින් ඇමරිකානු ආධාර යටතේ ප්‍රතිෂ්ඨාපනය කරන්නට පටන් ගත්තා පමනි. ශක්තිමත් හමුදාවක් ඉදිරියට පොලු අරන් ගියෙ ලංකාවේ මී හරක් ය.71 හා 89 කැරලි දෙකටම හේතුවුනේ එක් කැරිස්මැටික් නායකත්වයකි. ඔහුගේ නන්දෙඩවිලි යූටියුබ් එකෙන් ඇසිය හැක.,ආයෝජකයන් එලවන හැටි ,සුද්දන්ගෙන් වන්දි ගන්න හැටි  ඔහු කියවයි.

ඕනෑම ආන්ඩුවක් අවිගත් කල්ලිවලට පිළිතුරු දෙයි. 89 දීම චීනය අවි නොගත් තියනන්මෙන් සිසුන්ටද අවියෙන් පිළිතුරු දුන්නේය.සමාජවාදී පාලනයක දී මර්ධනය සිදුනොවන බවට කියන්නට බැරිය., ඇත්තෙන්ම තනි පක්ෂ රජයක මාධ්‍ය නිදහසක් කතා කිරීමේ නිදහස ඇතුලු කිසිම මානව හිමිකම නැති පරිසරයක මර්ධනය ගැන කවර කතාද.
ඇත්තෙන්ම එදා තරුණයන් දිවි පිදුවේ වෙනිසියුලාවේ ආර්ථිකයත් උතුරු කොරියවේ වැනි ප්‍රජාතන්ත්‍රවාදායකුත් වෙනුවෙන්ය.

පාසල් සිසුන්ට මිනීමරන්නට උගන්වන දේශපාලන බලවේගය එදා බලයට ආවානම් ලංකාව පොල්පොට්ගේ කාම්බෝජයක් වනු ඇත. එය එසේ සිදු නොවීය. එසේ වුනේ දුෂ්ටයන් ලෙස පසු කලෙක බෞතීස්ම ලැබූ දේශපාලන පොලිස් හමුදා චරිතවලට පින් සිදුවන්නටය්. උතුරේ කතාවත් මේකමය.

විශ්ව විද්‍යාලවල මුදා නොගත් ප්‍රදේශ ගැන මේ දිනවල කතා වෙයි. මේ ගැන තිත්ත ඇත්ත විජේදාස ඇමතිතුමා කෙළින්ම කීවේය. එදා සිටි ත්‍රස්තයන්ගේ වත්මන් අනුප්‍රාප්තිකයන් නවක වධය දෙමින් සිසුන්ගේ බ්‍රේන් වොෂ් කරමින් එදා බුද්ධික කුලතුංගලා කළ දේම අදද කරයි.
ගොර්බෂොප් ගේ පෙරෙස්ත්‍රොයිකාවට පින්සිදුවනනට අද ලොව පුරා කිසි තැනක මාක්ස්වාදී ත්‍රස්ත කල්ලි නැත. කොළොම්බියාවේ දිගුකාලීන සිවිල් යුද්ධයද නිමවුනේ සමාජ අසාධාරනය නිමවී නිර්ධන පන්තිය ලෝක සමාජවාදය දිනාගත් නිසා නොව ලෝක දේශපාලනයේ ඇතිවූ වෙනස්කම් නිසාය . මේ අනුව එදා දිවි පුදා තිබුනේ සෝවියට් චීන අවශ්‍යතාවයකටය. සෝවියට් දේශයේ වැස්ස පායපු ගමන් ලොව පුරා කුඩ අකුලාගත්තේ එබැවිනි.

ලංකාව වැනි කුඩා රටක ආර්ථිකය සමන්විත විය යුත්තේ යෝධයන්ට සේවා සපයමිනි. කුඩා රටක සමාජවාදයක් හදා සංවෘත වී අපට ලැබෙන දෙයක් නැත. ඇබිලිපිටියේ සිසු ඛේදවාචකය ලංකාවේ මතුනොව ලොව පුරා සියලු තරුණයන්ට පාඩමකි. දරුවන් බිලිබෝයිලා කර ගැනීමට මාන කොකුන් සේ කර පොවන බුද්ධික කුලතුංගලා හැම තැනම සිටිති.බිලිබෝයිලා ඉදිරියට දමා ඔවුහු උපක්‍රමශීලීව පන බේරාගනිති.බිල්ලට යන්නේ ඉදිරිපෙලට දමන ලමා සොල්දාදුවෝය.

බුද්ධිකලාගේ වැඩ නිසා බිලිබොයිලට ජීවිතද ජාලිය ඈපාලාට තම වෘත්තීය අනාගතයද අහිමිවේ. රටක් ලෙස අපට සියල්ලම අහිමිවේ.

6 comments:

  1. මතෝ, කවුද මේ කියන මාධ්‍යවේදියා, ලියු පොත මොකක්ද?

    ReplyDelete
    Replies
    1. සමාජයේ අනුකම්පාව ලබාගැනීමට අතිශයෝක්තියෙන් කරුණු දක්වා පොත් කිහිපයක් ලියා තිබෙනවා. මට කියවන්නට ලැබුනේ අමාවක අහස යට නම් පොතයි. එහි ඇති කරුණුත් අසත්‍ය යි. නමුත් ඔහුගේ ලේඛන හැකියාවවිශිෂ්ටයි.
      මේ ලිපිය ලියන්නට පාදක කරගත්තේ එම පොතයි. එය මා ලග තියෙනවා

      Delete
  2. නවක වදය දෙනගමන් නිදහස් අධ්‍යාපනය ගැන කතා කරන ව්‍යාපාර තියන රටක්නෙ. ඒක නවත්වන්න දශක ගානක් ගිහිල්ලවත් කාටවත් බැරිවෙලා තියනවනෙ. ලොකු පක්ශවල දේශපාලකයින්ගේ වැරදි ගැන හැමෝම දන්නව, බනිනව. ඒත් විශ්ව විද්‍යාලවල දේශපාලනය කරන අයත් එහෙමම තමයි

    ReplyDelete
    Replies
    1. මැතිවරණයකට ඉදිරිපත්වෙනවා තබා සෙනග මදි නිසා මැයි දින පෙලපාලි තියන්න පොඩි පිට්ටනි හොයන පක්ෂයක් මෙතරම් බලපෑමක් කරන හැටි පුදුමයි.
      ඇත්තෙන්ම මොවුන් සිය පක්ෂයට සාමාජිකයන් බදවා ගන්නේම නවක වදය හරහායි. මෙම තත්වය හැත්තැගනන්වල ඉදන්ම තිබෙන්නක්

      Delete
  3. ඇබිලිපිටියේ මිනීමරපු රාජ්ය. ත්රචස්තවාදීන්ට කඩේ යන්නෙ මුග්ද මානසිකත්වයක් තියන ත්රලස්තවාදියො............
    එක එක බලවතුන්ගෙ සහ ඔවුන්ගේ බේබිලාගේ ලිoගික සහ අනෙකුත් අසාදාරනයන්ට එරෙහිව කතා කරපු කොල්ලො ගෙවල්වල නිදාගෙන ඉන්නකොට අල්ලගෙන ගිහිල්ලා මරලා පුච්චලා එ අතරට ජෙවීපී පවුලක කොල්ලෙක් දෙන්නෙකුත් මරලා දාලා මුන් ඔක්කොම ජෙවිපී කාරයො කියලා කියපුවහාම රාජ්ය ත්රනස්තවාදය සාදාරනියකරනය වෙනවද?

    ඔයාටනම් තියෙන්නෙ මානසික රොගයක්.................

    ඇබිලිපිටියෙ අහින්සක ලමයි ටික මරලා තමයි මෙගොල්ලො සොවියට් දේශය බිදවට්ටලා තියෙන්නෙ............අනෙ පවු............

    ලොකේ මාක්ස්වාදි කල්ලි ඉවරලු...........දැන් එතකොට ලෝකයට සාමය උදාවෙලා නේද ? මාක්ස්වාදී කල්ලි මොකටද දැන් තියෙන්නේ අයි.එස්.අයි.එස් තලෙභාන් ජිහාඩ් කල්ලි ටික තමන්ගෙ දෙවියන්ට නොවැන්ද නිසාම කිරි දරුවගෙ උනත් බෙල්ල කපන.............. කොහොමද මාක්ස්වාදය බිදවැටිලා ලෝකයට සාමය උදා වෙලා තියන ලස්සන..............

    තමුන්ට තියෙන්නෙ ඔය කුප්ප මාද්යක කෙලපු කෙබ්බ ගිලලා බය වෙලා ඇති උනු සෝශලිස්ට් ෆෝබියාවක්................

    කුලතුන්ග ජෙවිපි කලාද, ඔය මරපු ලමයි ජෙවිපි කලාද, මෙවාට එකම එක සාක්ශියක් වත් පෙන්වන්න රාජ්ය. ත්රාස්තවාදියො අසමත්.......... කුලතුන්ග ඇත්තටම රට ගියාද නැත්නම් රාජ්ය් ත්ර්ස්තවාදියො මිනිහාව මරලා හන්ගලා ලමයි ටිකත් මරලා උබලා වගේ ගොන්නුන්ට විශ්වාස කරන්න මෙ කතාව ගෙතුව වෙන්න පුලුවන්...............

    ඔය කියන අය කඩාකප්පල් කාරි වැඩ වලට සම්භන්ද උනා කියන්න පිලිගත හැකි එකම සාක්ශියක් වත් නැතිව මෙ අතුරුදහන් වෙච්ච දරුවන්ව ත්රභස්තවාදින් කියන උන් රාජ්යා ත්ර්ස්තවාදය වෙනුවෙන් පෙනී හිටින රාජ්ය ත්රසස්තවාදයට අනුකම්පාව ගන්න හදන නපුන්සකයො රැලක් කියන එක කියන්නම ඔන.............

    ReplyDelete
    Replies
    1. සිරාවටම ඔයාට ලොකු මානසික අවුලක් තියෙනව. ඇඹිලිපිටියෙ සිද්ධියෙන් සෝවියට් දේශය බිද දැම්ම කියන්නෙ ඇත්තටමද

      ඔයාට එක්කො සිංහල වාක්‍ය තේරුම් ගන්න අමාරුවක් තියෙනව
      මම කිව්වෙ සෝවියට් දේශය කලින්ම බිද වැටුනනම් 89 කැරලිකාර තත්වයක් එන්නෙ නෑ කියල කිව්වෙ. අද ඔය කියන අසාධාරනකම් නැද්ද අද ලෝකෙ කොහෙවත් මාක්ස්වාදී කැරලි නෑ
      දැන් සාධාරණ සමාජය බිහිවෙලාද දැන් ලංකාවෙ හෝ ලෝකෙ කැරලි නැත්තෙ කලාමැදිරියෝ

      සෝවියට් විප්ලවයම ඓතිහාසික අත්වැරැද්දක්. ඒක දැන් හැමෝම වගෙ පිලිගන්නවා. සමාජවාදය බිහිවෙන්නෙ ධනවාදය අභාවයට යාමෙන්. මාක්ස්වාදීන් මේ මතය පිලිගන්නෙ නෑ. සෝවියට් දේශයෙ ධනවාදය මෝරල තිබුනෙ නෑ චීනෙත් එහෙමයි.ඔය කියන සමාජවාදී විප්ලව කොහෙවත් වුනේ නෑ . හැම තැනම බිහිවුනේ ත්‍රස්තවාදී ආන්ඩු.

      දෙපාර්ශ්වයක් යුද්ධ කරන විට කොහෙත්ම සාමාන්‍ය නීතිය යටතෙ කරන ක්‍රියාකාරකම් කරන්න බෑ. නමුත් මේ අය පුනරුත්ථාපනය කළානම් ඔවුන් එලියට එන්නෙ ඔය පක්ෂයෙ විරුද්ධවාදීන් ලෙස.

      ඒ කාලෙ තිබ්බ තත්වය අනුව කොහොමද සාක්ෂි හොය හොය ඉන්නෙ. තුන්ඩු කෑල්ලෙන් රටම අකර්මන්‍ය වෙලා තිබුනෙ. රටම ජවිපෙට බයෙන් සිටියෙ. රජයෙ ප්‍රතිප්‍රහාර හමුවෙ සාමය ඇතිවුනා.
      ඔයාල ත්‍රස්තවාදී වැඩ කලා කියල පාපොච්චාරනයක්වත් නොකර මොකුත්ම කලේ නෑ කලානම් කෝ සාක්ෂි කියල සාක්ෂි ඉල්ලන්නෙ කොහොමද
      ඒ කාලෙ පාසල් සිසුන් ළමා සොල්දාදුවන් ලෙස බදවාගත් බව ඔයත් මමත් රටමත් දන්නවනෙ.

      ඔයාට ඕනනම් මෙහෙම කියන්න. ජවිපෙ මොකුත්ම කලේ නෑ අපරාධ සිදුවෙනකොට ජවිපෙත් හිටිය නැත්නම් ලෝක අධිරාජ්‍යවාදීන් මර්ධනය දියත් කරනකොට ප්‍රතිප්‍රහාර දුන්න වගෙ පහේ පන්තියෙ ලමයි රවටන්න පුලුවන් කතාවක්
      නැත්නම් ජවිපෙ මොකුත්ම කලේ නෑ. ඒව ස්වාභාවිකව සිදුවුනා සමාජ ආර්ථික බලවේග නිසා. තුන්ඩු කෑලිවලින් කඩ වැහුවෙ නෑ රජයේ දේපොල විනාශ කලේ නෑ. තහනම නොතකා වැඩට ගිය අර මරල දනිහෙන් පහල ගෙනියන්න අන දුන්නෙ නෑ. ඒ අන කැඩුවම මිනිය මිදුලට ගෙනිහින් දැම්මෙ නෑ. කලාමැදිරියෝ මේ රටේ මිනිස්සු ඔය කාලෙ හිටිය.කවුරුත් මැරිල ඉපදිල නෑ. ඔය කතා මීට අවුරුදු 100 කට පස්සෙ කියාපන්.

      මහජන චන්දයෙන් පත්කල ආන්ඩුවක් මැරබලය යොදවල පෙරලන්න බෑ . ඊට පස්සෙ මැතිවරන මානව හිමිකම් මොකුත් නෑ මාක්ස්වාදී මැරයන්ගෙ හිතුමතය තමා . ධනපතියන් වෙනුවට පක්ෂය ආදේශ වෙනව. ඊට පස්සෙ රටක් නෙමේ සත්තුවත්තක්.

      කලාමැදිරියෝ කියල ආමන්ත්‍රනය කරල තියෙන්නෙ ප්‍රඥාව හා සාමාන්‍ය බුද්ධිය අතින් ඝන අන්ධකාරයක සිටින්නෙක් බව පේන නිසා.

      Delete