Sunday, March 30, 2014

යකාගෙ දේශපාලන විග්‍රහය 2014 ( බස්නාහිර දකුණ පළාත් සභා මැතිවරණ )

මැතිවරණ විචාරයක් කරන පළමු අවස්ථාවයි.මීට පෙර පැවති මැතිවරණ වලදීද විවිධ අදහස් හිතට ආවද කියා ගන්න ක්‍රමයක් නොවීය. එහෙත් තාක්ෂණයට පින්සිදුවන්නට දැන් ඒවා තවදුරටත් සිතිවිලිම නොවේ.
සාමාන්‍යයෙන් ඕනෑම මැතිවරණයකදී පරාජිතයන් කියන්නේ රටේ වැඩියෙන් ඉන්නෙ හරක් කියාය.ජයග්‍රාහකයන් කියන්නේ බුද්ධිමත් ජනතාව චන්දය පාවිච්චි කර ඇති බවයි. එහෙත් මේ කතා දෙකම සත්‍ය නොවේ.

කෙසේ වතුදු මෙම මැතිවරණය සුවිශේෂී මැතිවරණයකි. ඊට හේතුව රටේ උගත් බුද්ධිමත් ජනතාවක් වෙසෙන පළාත් දෙකෙහි පැවති මැතිවරණයක් වීමයි.විශේෂයෙන් බස්නාහිර පළාතේ උගත් මධ්‍යම පන්තියක් වෙයි.ඊට අමතරව කොළඹ දිස්ත්‍රික්කය යනු විශාල සුළුජාතික චන්ද පදනමක් සහිතය එසේම  නාගරික චන්දදායකයන් වෙසෙන ප්‍රදේශයකි.වෙනස්වීම් වලට මුලින්ම සංවේදී නාගරික චන්දදායකයන්ය.

2009 සිටම විපක්ෂය බින්දුවට බස්සමින් ජය පිට ජය ලබමින් ඉදිරියට ආ ආණ්ඩුව යම් පසුබෑමකට ලක් වූ නිසා මේ මැතිවරණය අධ්‍යනය කිරීම වැදගත්ය. එසේම අපට කිසිම දේශපාලන පක්ෂපාතීකමක්ද කිසිවෙකු කෙරෙහි නැති නිසා එය වඩාත් පහසු වෙයි.කොළඹ දිස්ත්‍රික්කයේ ඡන්ද ප්‍රතිඵල සුවිශේෂී වන්නේ එහිදී ආණ්ඩුවට වඩා විපක්ෂයට ඡන්ද වැටී තිබීම නිසාය. 17 වසරක් පැවති එජාප ආණ්ඩුව ගෙදර යැවීමේ පළමු වෙඩිමුරය තැබුවේද කොළඹ ජනතාව බව මෙහිදී කිව යුතුය. ඒ 1993 පළාත් සභා මැතිවරණයේදීය.එම චන්දයේද කොළඹ එක්සත් ජාතික පක්ෂය තනිව ගත් ආසනවලට වඩා විපක්ෂයේ අනෙක් පක්ෂ ගෙන ඇත. වයඹ හා දකුණේ වැට උඩ ආණ්ඩු පිහිටුවන ලදී. මෙහිදීද ලැබුනේ එවැනි සඥාවක්ද?

මෙම ඡන්දයේ තවත් වැදගත්කමක් නම් මෙතෙක් කල් අනභිභවනීය යැයි සිතා සිටි ආණ්ඩුව මැතිවරණයකදී පරාජය කළ හැකිය යන මතය විපක්ෂ ඡන්දදායකයා තුල ඇතිවී තිබේ.මෙවැනි තත්වයක් ඇතිවීමට හේතු මොනවාදැයි බලමු.එජාපය කොළඹැ දිස්ත්‍රික්කයේ ජයගෙන ඇති සියළු ආසන විශාල සුළුජන පදනාමක් සහිත ආසන වේ.රත්මලාන හා දෙහිවල පවා සුළුජන ඡන්ද පදනම ඉහල ගොස් ඇත. මෙය එක් එළඹුමකි.


එසේම ආර්ථික දුෂ්කරතා වැඩියෙන්ම දැනෙන්නේ නාගරිකයන්ටය. එජාපය ජයගෙන ඇති සියළු ආසන නාගරික ආසන වේ.ගාල්ල පවා සුළුජන ඡන්ද පදනමක් සහිත නාගරිකයකි. එහෙත් මෙය එකම එළඹුම ලෙස ගැනීමට අප අකමැත්තෙමු.


නාගරික ප්‍රදේශවල ජනතාව අන්තර්ජාලය භාවිතයද ඉහල නිසා දූෂණ වංචා නාස්තිකාරකම් හා වෙනත් දුෂ්ටකම් ගැ ගැමියන්ට වඩා දැනුවත් බවකින් සිටිති.සියළුම මුද්‍රිත හා විද්‍යුත් මාධ්‍ය නිර්වින්දනයට ලක් වී ඇති නිසා අන්තර්ජාලය පරිහරණය නොකරන අය ළිදේ සිටින මැඩියන් සේය. නමුත් ගම් මට්ටමේ හොරාකෑම් සිදුවෙන බව ගැමියෝද දනිති.ඉන් එහා දේවල් ගැන කටකතාද යයි.එහෙත් නාගරික සයිබර් ජනතාව මෙන් නොවේ


මෙම මැතිවරණයේ එක් සුවිශේෂී ප්‍රතිඵලයක් නම් මාතර ඡන්ද බලප්‍රදේශයේ ඡන්ද ප්‍රතිඵලයයි. එය කොළඹ සමස්ත ප්‍රතිඵලයට සමාන විය. ඊට හේතුව මාතර දුරාව කුලයේ ජනතාව බහුල වීමත් දුරාව කුලයේ පුද්ගලයෙකු එජාපයේ ඉදිරිපෙළ ප්‍රහාරකයෙකු වීමත්ය.කුල සාධකය මැතිවරණවල ඉතා ප්‍රමුඛ සාධකයකි.


මෙම මැතිවරණයේදී කෙනෙකු පුදුමයට පත් කරවන ඡන්ද ප්‍රතිඵලයක් නම් හම්බන්තොට ප්‍රතිඵලයයි. බැලූ බැල්මට යමක් කීමට ඉක්මන් විය යුතු නොවන්නේ හම්බන්තොට යනු සුවිශේෂී දේශපාලන කලාපයක් නිසයි.2001 මැතිවරණයේ හම්බන්තොට ප්‍රතිපලයට අනුව හම්බන්තොට ආසන හතරම එජාපය ජයගෙන තිබිණි.එහෙත් හම්බන්තොට යූඇන්පී දිස්ත්‍රික්කයක් නොවේ.එසේනම් යූ ඇන් පී දිනන්නේ කෙසේදැයි බලමු. හේතුව පොදු පෙරමුණ හා ජවිපෙ වෙනම ඉල්ලීමයි. ඇත්තෙන්ම හම්බන්තොට යනු විශාල ජවිපෙ ඡන්දදායක පිරිසක් සිටින ප්‍රදේශයකි. තිස්සමහාරාම ප්‍රාදේශීය සභාව පවා ජය ගැනීමට ජවිපෙ සමත් විය.එසේම මහා සංහාරයෙන් පසු 1994 දී ජවිපෙට මන්ත්‍රී ආසනයක් දිනා ගත හැකිවුනේද හම්බන්තොටිනි.



2005 න් පසු හම්බන්තොට විශාල සංවර්ධන වැඩ රාශියක් කරන ලදී. රජයේ සංවර්ධනයේ කේන්ද්‍රස්ථානයද හම්බන්තොටයි. මීට පෙර 2009 දී ඌව පළාතේ දිස්ත්‍රික්කවල ප්‍රතිඵලත් හම්බන්තොට දිස්ත්‍රික්කයේ ප්‍රතිඵලත් විමසන විට ඌවේ දිස්ත්‍රික්කවල රජය 80% පන්නා දිනන විට හම්බන්තොට ජයගත් ප්‍රතිශතය ඊට බෙහෙවින් අඩු විය.


මෙම මැතිවරයේදී හම්බන්තොට දී ආණ්ඩුව ලබා ගත් ඡන්ද ප්‍රතිශත සැළැකිය යුතු ලෙස අඩුවී ඇත. එයට හේතුව ජවිපෙ පිබිදීමයි එසේම දකුණු පළාතේ සියළුම ප්‍රදේශවල ජවිපෙ පිබිදීමක් දක්නට ඇත. ෆොන්සේකාගේ පක්ෂය බස්නාහිර දී ජවිපෙ ඉක්මවා තෙවන ස්ථානයට පත් වී ඇත.


එසේම අනාකලී හා නදීශා අන්ත පරාජයට පත්වීම තවත් අපූරු සංසිද්ධියකි. එහෙත් ගාල්ලේදී ගීතා ජයගෙන ඇත.ගම්මන්පිළ පරදවා හිරුනිකා කොළඹින් අංක එකට පැමිණීමද විශේෂ දෙයකි.

දේශපාලන පක්ෂ ආගම් ලෙස අදහන කිසියම් ප්‍රතිශතයක් තමන්ගේ ලේ කොල පාට හෝ නිල්පාට යැයි සිතති.එහෙත් මේ පිරිස එන්න එන්නම අඩුවෙමින් යයි.ආණ්ඩුව ලබන ඡන්ද හුදෙක් ශ්‍රීලනිපයේ ශක්තියක් ලෙස සැළැකිය යුතු නැත. යූ ඇන්පී කාලෙ එජාපය තනි පක්ෂයක් ලෙස ඡන්ද ගත්තේද මේ ලෙසමය.

සමහර අය කියන්නේ 2009 දී යුධ උනුසුම නිසා ගත් ඡන්ද ප්‍රතිශත මෙවර අඩුවූ බවයි.එහෙත් 2013 වයඹ මධ්‍යම පළාත් සභා වල ආණ්ඩුව ලබා ගත් ඡන්ද ප්‍රතිශත 2009 දී ඒ දෙපළාතේදී ගත් ප්‍රතිශතවලට වඩා වැඩිය.එසේම ජිනීවා කරුණු මැතිවරණ ප්‍රතිපලයට බලපා නැත.


මෙම ඡන්දයේදී ජවිපෙ හා ප්‍රජාතන්ත්‍රවාදී පක්ෂය හරහා අළුත් මුහුණු රැසක් මතුවී ඇත.මේ අය ආන්ඩුවට ගියත් මේ අයට තමන්ගේම කියා ජනබලයක් නැති නිසා ලොකු වෙනසක් සිදු නොවේ. ප්‍රජාතන්ත්‍රවාදී පක්ෂය ෆොන්සේකා  මත පදනම් වන අතර ජවිපෙ න්‍යාත්මක දේශපාලනයක් කරන්නකි.එහිදීද පුද්ගලයා වැදගත් නැත.නමුත් පුද්ගල එහා මෙහා වීම් වලදී මොරාල් ඩවුන් වීම නම් සිදුවේ.


මේ මැතිවරණයේදී තරුණ ඡන්ද ගිනිසිළුවට හෝ ජවිපෙට ලැබී ඇත. ඇත්තෙනම් අද පාවෙන ඡන්ද වැඩිය.මෙම පක්ෂ දෙකම නාස්තිය හා දූෂණය තම ප්‍රධාන තේමාව කර ගත්හ.මෙම පක්ෂ ශක්තිමත්වීම වත්මනේදී ප්‍රජාතන්ත්‍රවාදයට හොඳය.


මේ මැතිවරනයේදී මෙසේ වුනත් ඊලඟට තිබෙන ඌවේදී මෙය හාත්පසින්ම වෙනස් වී ආණ්ඩුව 80% පන්නා ඡන්ද ප්‍රතිශත ලැබීමට ඉඩ ඇත.කෙසේ වෙතත් රජය තේරුම් ගත යුතු කරුණක් තිබේ.එනම් රට පුරා පැතිර ඇති වංචා දූෂන හා නාස්තිකාරකම් ගැනය. ඉන්දියාවේ කොන්ග්‍රස් පක්ෂයටාද අවාසියට හිටින්නේ දූෂන හා වංචාවන්ය. දිල්ලි ප්‍රදේශය  කොන්ග්‍රස් බීජේපී දෙකෙන්ම ගිලිහී අළුත් පක්ෂයකට ගියේ ඒ නිසාය. ශ්‍රී ලන්කාවේ වංචා  හා දූෂනයට අමතරව නාස්තිය ද වෙයි.බොරු වැඩ විකාර වැඩ සෝබන වැඩ ද වෙයි.


පොඩ්ඩන් මෙන්ම ලොක්කන්ද නීතියට අවනත වන එතනෝල් හා කුඩුවලින් තොරවූ වංචා දූෂන නැති යහපත් රටක් බිහිවීමට මේ මැතිවරණ ප්‍රතිඵලය හේතු වාසනා වේවා.


****                    *****                          *******

පසුව ලියමි

මේ මැතිවරණ ක්‍රමය වෙනස් විය යුතුය.නැවත කේවළ ක්‍රමයට යාම විසදුම නොවේ.මැතිවරණයේදී ඡන්දදායකයාගේ මනස සකස් කිරීම අවම කිරීමටත් ඕනෑම කෙනෙකුට ඡන්දයට ඉදිරිපත් වීමට හැකිවන ලෙසත් කිසියම් වෙනසක් විය යුතුය.එහිදී ප්‍රායෝගික සුළු අදහසක් ඉදිරිපත් කිරීමට කැමැත්තෙමි.මෙය කේවළ හා සමානුපාතික ක්‍රම වල මිශ්‍රනයකි. එනම් හැම ආසනයකටම ලැයිස්තුවක් ලබා දී එයින් කැමති කෙනෙක් තෝරා ගැනීමට ඉඩ දීමයි.


උදාහරණයක් ලෙස බොරැල්ල ආසනය ගනිමු. බොරැල්ල ආසනයේ ජනතාව තමන් කැමති පක්ෂය දිනවා එම පක්ෂය විසින් නම් කරන කෙනා ස්වයංක්‍රීයව පාර්ලිමේන්තු නොයවා බොරැල්ල නාම ලේඛනයෙන් තමන් කැමති කෙනෙක් නම් කර යැවිය හැක.මෙහිදී හැම ආසනයකටම මන්ත්‍රීවරයෙක් සිටින අතර මැතිවරණය දිස්ත්‍රික්කයේම ධනවත් බලවත් දෙතුන් දෙනෙකු ගේ ඒකාධිකාරයක් වෙන්නේද නැත.මෙහිදී මන්ත්‍රීවරු පක්ෂ නායකත්වය සමඟ පෙර මෙන් දැඩි ඍජු සම්බන්ධතාවයක්ද නැත.






Sunday, March 16, 2014

මැදින් පොහෝදා යකාගෙ කවි


මැදින් මහ පොහෝ දින 
උදේ සිට ඇදි ඇදී ගිය
කඳු අතර හෙල් අතර
ගමන නිම විය සවස

විඩා  බව හැර පියා
ජනේලද හැර පියා
සිසිල් සුලඟක් පතා
පුටුවටම බර වුනෙමි



දහවලම ගිල ගත්ත
මහා රකුසෙකු ලෙසින 
හාත්පස පැතිර ඇති
අන්ධකාරය රජෙකි

නැත නින්ද මා අසළ
සිතට රැය දැනී නැත
ඒ  නිසා ලැපද ගෙ                                              
සිත එයට වගුරුවමි.

මේ ලියන ඇඩ්මින් මෙමා 
තවත් එක් සතෙක් බව
පිරිසිද දැනගෙනම
ලෝසතුන් දෙස බලමි

ඒ මහා සත්ව කැළ
කෙළවරක් නැති සසර
සැරිසරන කතන්දර
අප සැවොම අසා ඇත

සියල්ලෙන් වියෝ වූ
ආත්මය හෝ සිතක්
නැති බවම වදාලූ 
බුදු සිරිත මම දකිමි.

නැති සිතක් යළි නසන
දරන මෙහෙයක් කුමට
ලොවට ඇලුමක් නැතිව
ලොවම දෙස බලනු මිස

පුහුණු කළ විට මනස
ලොවේ රස විඳ විඳම
එයට නොම වී ගොදුරු
යෙහෙන් දවසැරිය හැක

මේ දහම සනාතන
දත් පබසර සිතම
බැබලේ ආනන්දයෙන්
නිරන්තර ප්‍රීතියෙන්

Wednesday, March 5, 2014

බලන් කඩතුරා හැර දෑසේ

විශේෂ සටහන : මෙම ලිපිය තවත් කරුණු අඩංගු කර යළි විශේෂයෙන් සකස් කරන ලදී. කිසිදු අදහසක් වාරණය නොකෙරේ.මට බනින ඒවා ,කුණුහරප හෝ තෙවන පාර්ශ්වකයට අපහාස කරන ඒවාටද ඉඩ දෙමි.

සාධාරණ යහපත් සමාජයක් යනු කුමක්ද ( අධානග්‍රාහී නොවන විග්‍රහයක් )


අහුලන් කන දඩයමේ යන ඈත අතීතයේ මිනිස් රංචු නිෂ්පාදනය කළේ තමන් අහුලා ගත් දේ සහ දඩයම් කළ දේය.මෙහිදී ද තාක්ෂනයක් භාවිතා විය.එසේම මෙම සමාජයේ තාක්ෂණික දැනුම සහිත අය සෙසු අයට වඩා ඉදිරියෙන් සිටියහ.මෙහිදී නිෂ්පාදනය යන්න අපි කෙසේ අර්ථ දක්වමුද? කුමක්ද නිෂ්පාදනය කරන්නේ? ආහාර ,ඇදුම් පැළදුම් පමනක්ද ? ලෞකික හා ලෞකික නොවන ප්‍රවාදයන්ද නිෂ්පාදිතය ලෙස හදුන්වමු.එනම් දෙවිවරු,මරණින් මතු ජීවිතය වැනි සියළු ආකාරයේ දැනුම නිෂ්පාදිතයයි.මෙම නිෂ්පාදිතය නිෂ්පාදනය කරන ක්‍රමවේදයන් ඇත.මේ ක්‍රමවේදයන් එකිනෙක සමාජ වලට වෙනස්ය.මේ හේතුවෙන් එක් සමාජයක් අනෙක් සාමයෙන් වෙනස් වේ.එසේම මෙම කරුණ මත කලින් කලට සමාජය වෙනස් වේ.

නිෂ්පාදන ක්‍රමවේදයට දක්වන දායකත්වය අනුව එකම සමාජයේ පුද්ගලයෙකු තවත් පුද්ගලයෙකුගෙන් වෙනස් වේ.ඒ අනුව සමාජයක පුද්ගලයන් එකිනෙකා අතර වෙනස්කම් දැකිය හැකි අතර ඊට හේතුව මේ නිෂ්පාදන ක්‍රමවේදයට ඒ ඒ පුද්ගලයන් දක්වන දායකත්වය වෙනස් වීමයි.උදාහරනයකට අනුව පුරාන මිසරයේ පූජකයා නිෂ්පාදන ක්‍රමවේදයට දක්වන දායකත්වය පාරාවෝගෙන් වෙනස්ය.මෙහිදී ඊලඟ ගැටලුව මතු වෙයි.

ඊලඟ අදහස දායකත්වය දැක්වීමේ අවස්ථව යන්නයි.පුරාන සමාජයේ මෙම අවස්ථාව ලැබුනේ පරම්පරාවෙනි.ඊට හේතුව රුධිරගත හෝ වෙනත් ගුප්ත ක්‍රමයකට පරම්පරාවෙන් උරුමය ලැබීම එදා පිළිගත් බැවිනි.එය එදා දැනුමට සාපේක්ෂය.
අප මානව සමාජයේ මූලික තැනුම් ඒකකයක් ගැන කතා කරමු.මෙහිදී එකිනෙකා දන්නා හදුනන කුඩා සමාජය තුල පුද්ගල සම්මුතියක් විය.එක් එක් පුද්ගලයා එකිනෙකාගේ අවශ්‍යතා සදහා සම්මුතිගතව සිටියේය.ජනගහනය වැඩිවීමෙන් හෝ ගෝත්‍ර ඒකාබද්ධ වීමෙන් මහා සමාජයක් බවට පත් වූ පසු ඉහත කී කුඩා ඒකක රාශියක් අර මහා සමාජයේ දක්නට ලැබුනි.මෙහිදී මෙම මහා සමාජයේ සම්මුතිය දක්නට ලැබුනේ සිරස් පිරමිඩයක විලසිනි.

වඩුවෙකු පුටුවක් සාදයි.මෙම පුටුව පුටුවක් අවශ්‍ය කෙනෙකුට වික්කා කියමු.එවිට ගැටළුවක් නැත.නමුත් කෙනෙක් වඩුවා සේවයේ යෙදවූවායි සිතමු.එවිට වඩුවා පුටුව සෑදීමට තම කායික හා මානසික ශ්‍රමය වැය කරයි.වඩුවාගේ ස්වාමියා පුටුව රුපියල් 100 කට විකුණා වඩුවාට රු 75 ක් දෙයි.වඩුවා ඉතිරි රු 25ත් ඉල්ලා සිටීම හරිද?
වඩුවා සේවයේ යෙදවූ තැනැත්තා පුටු විකිනීම කළමනාකරනය කළ යුතුය.මේ ඉතිරි රු 25 කළමනාකරන සංචිතය වේ.එසේම මෙය ශ්‍රමය  වැයකළ පුද්ගලයාට හිමි ඊනියා අතිරික්ත වටිනාකමක් නොවේ.එහෙම දෙයක් නැත.වඩුවා ලැබුවේ ඔහුගේ උපරිම හිමිකමයි.නිෂ්පාදන හා බෙදා හැරීමේ ක්‍රමවේදය තුල වඩුවාගේ භූමිකාව එසේය.මේ ක්‍රමවේදය වෙනස් වන විට මෙහි දායකත්වය දක්වන පුද්ගලයන්ද වෙනස් වේ.ධනය රැදෙන්නේ කොහිදැයි තීරණයවීම නිෂ්පාදන ක්‍රමවේදය නිසා ගොඩ නැගුන ව්‍යුහයේ සැකැස්ම අනුව තීරනය වේ.

භාන්ඩයක සැබෑ අගය යනු එය නිෂ්පාදනයට ගිය මුදල හා කුලිය පමනක් නොවේ.යන්ත්‍ර සූත්‍ර නඩත්තුවට නව යන්ත්‍ර මිලදී ගැනීමට යන්ත්‍ර සූත්‍ර හිමිකරුවන්ගේ නඩත්තුවට අවශ්‍ය මුදල්ද එයට ඇතුලත්ය. නමුත් සමහර හැඟීම්බර ගීත වල තිබෙන ලෙස ගෙඩි සීයක් බිම දැම්මත් අප්පච්චිට එක ගෙඩියයි.අපි රැකෙන්නෙ ඒ ගෙඩි විකුනලයි  නංගියේ " වැනි ගීත ඊනියා ප්‍රගතිශීලීත්වයක් පෙන්වමින් රචනා කළ හැක. එහෙත් ඉඩමක් මිලදී ගෙන එහි  වගාවක් කර එය නඩත්තුකර එම නිපැයුම් අලෙවිකර මුදල් ලබා ගැනීමේ ක්‍රියාවලියේ ගෙඩි කඩන්නට කුලීකරුවෙක් ගත්තා කියල ඌට ඉඩමෙන් බාගයක් හෝ  පලදාවෙන් බාගයක් දීම අසාධාරණය.

මෙහි ඇත්තේ වෙන කිසිවක් නොව සරදියෙල් න්‍යායයි.සරදියෙල් සල්ලිකාර සුද්දන්ගෙන් මංකොල්ලකා දුප්පතුන් අතර බෙදුවේය.එම සල්ලි ගත් දුප්පතුන්ට මේවා සාධාරනද කියා සෙවීමේ අවශ්‍යතාවයක් නොවීය.න්‍යාය ඒ තරමටම සරලය.

තමන් කොටස්කරුවෙක් වන නිෂ්ජ්පාදන ක්‍රියාවලිය  පලදායක නැත්නම් කළ යුත්තේ වෙනත් ක්‍රියාවලියකට සම්බන්ධ වීමය.මෙහිදී අතිරික්ත වටිනාකම යැයි කියන අනුන්ගෙ සල්ලි ප්‍රාග්ධ්න භාන්ඩ හිමිකරුවාට නොදී රජය කියා ආයතනයකට දී එහි සැබෑ හිමිකරුවන් (පක්ෂය ) ලෙස පිරිසක් පත් වුනත් ඔවුන්ටද මෙම කොටස ප්‍රාග්ධන උපකරන නඩත්තුව හා ඉදිරි ආයෝජන සදහා අවශ්‍යය.

ඇමරිකාවෙ ක්‍රමයත් සෝවියට් දේශයේ ක්‍රමයේත් වෙනසක් නැත.එකම වෙනස ඇමරිකාවේ ලාභ සමාගම් වලටත් සෝවියට් දේශයේ ලාභ රජයටත් හිමිවීමයි.මෙතන නම් වල වෙනසක් පමනි ඇත්තේ.

ඔබ සතුව ට්‍රැක්ටරයක් ඇතැයි සිතන්න.ඔබ එය පැදවීමට කුලීකරුවෙක් බදවා ගනී.මෙවැනි කුලීකරුවන් විශාල ප්‍රමාණයක් ඇති අතර එයට අතිවිශේෂ ඥානයක් අවශ්‍ය නැත.ට්‍රැක්ටරයෙන් උපයන සියළු මුදල් කුලීකරුවාගේ අයිතිය නොවේ.නමුත් කවුරු හෝ එසේ කුලීකරුවාට උගන්වා ඔබ කෙරෙහි වෛරයක් ඇති කළ හැක.ඔබ කුලීකරුවාව සූරාකන බව ඔහුට පහසුවෙන් ඒත්තු ගැන්විය හැක.මෙහිදී කම්කරුවා යනු කවුද? මාක්ස් නම් කීවේ මාළු දැලක් කාට හෝ හිමි නම් ඔහුත් කම්කරුවෙකු නොවන බවයි.

දැන් ඔබ සතුව ඇත්තේ එක් ට්‍රැක්ටරයක් පමනක් නිසා ඔබ බදවා ගත් කම්කරුවාත් ඔබත් අතර ලොකු ආර්ථික පරතරයක් නැත.නමුත් ඔබ ට්‍රැක්ටර සීයක් මිලට ගෙන කම්කරුවන් සීයක් යෙදවූවායැයි සිතමු.දැන් ඒකකය විස්තාරනය වී ඇත,දැන් සියල්ල ලොකුය.ප්‍රාග්ධන භාන්ඩ නඩත්තුවට යන වියදමද වැඩිය.කුලීකරුවට ගෙවන මුළු පඩියද වැඩිය.ඔබට ලැබෙන ලාභයද වැඩිය.ඔබ කිසිවෙකු සූරා කා නැත.ඔබ ඔබේ හිමිකම ලබා ගෙන ඇත.

මහා ධනවතුන් බිහිවන්නේ මෙසේ ඒකකය විස්තාරනය වීමෙනි.මෙසේ ඒකකය විස්තාරනය වීමෙන් බිහිවන්නේ ධනවතුන් පමනක්ද? නැත බලවතුන් ,නිළවතුන්,ගුණවතුන්ද බිහිවේ. ඉහත කී ව්‍යාජ අගය එක් කිරීමේ මහා සමාජයේ සිරස් පිරමිඩය සකස් කෙරේ.
මෙසේ විස්තාරනය අවම කළ විට සිරස් පිරමිඩය වෙනුවට තිරස් සමාජ සම්මුතියක් ගොඩ නැගේ.
  
එසේම ඉතා භයානක සර්පයෙක් අප අසල ගැවසේ. ඒ සර්පයා අන් කවරෙකුවත් නොව පක්ෂයයි.මේ පක්ෂය නම් වූ රාක්ෂයා ගේ දරුණුකම අඩුවී ඇත්තේ පක්ෂ කිහිපයක් තිබීමෙනි.බහු පක්ෂ ප්‍රජාතන්ත්‍රවාදය වැදගත් එබැවිනි.එහෙත් පක්ෂය නම්වූ රාක්ෂයා මහා පරිමානයෙන් විස්තාරනය වූ ඒකකයකි.එහි ඉහල සිට පහලට අනුහස ගලයි.බලය මහා පරිමානයෙන් ඒකරාශී වේ.මහා පරිමානයෙන් විස්තාරනය වන නිසා බලයද ඉතා වැඩිය.

එහෙත් සමාජය යන්න දැනටම විස්තාරනය වූ ඒකකයකි.මෙම ඒකකයේ විස්තාරනය වූ ඒකකයක් ඇත.ආධිපත්‍ය අරමුණු අක්‍රගත් එම ඒකකය රාජ්‍ය නම් වේ.පක්ෂය ඊට සමාන්තර ඒකකයක් නොව ඡායා ඒකකයකි.එය කරනුයේ පවතින රාජ්‍ය නම් වූ ඒකකයට බද්ධ වීමයි.ආණ්ඩුව හා රාජ්‍ය යනු දෙකකි.මෙසේ රාජ්‍ය නම් වූ පවතින අබ්ල ඒකකයට බද්ධ වීමෙන් ආන්ඩුව ක්‍රියාත්මක වේ.පක්ෂය පිටස්තරව තිබෙන නමුත් රාජ්ය සේම ඡායා ස්වරූපයෙන් පවතින බල ඒකකයකි.එය ද විස්තාරනය වූවකි.ප්‍රමානයෙන් විශාල වන තරමට එහි සියල්ල විශාල වේ.

ආගමික සංස්ථාද, නිළබලරටාවන්ද මෙසේම විස්තාරනය වන තරමට එහි ගුණාංග විශාල වේ.මේ සියල්ලේම විස්තාරනය අඩුකිරීමෙන් මේවාගේ සෑම ගුණාංගයකම තත්වය බාල කළ හැක.
නමුත් එලෙස කම්කරුවාට හිමි අතිරික්ත අගයක් නැතත් මෙම සමාජ සංරචක සමාජය තුල නිරූපනයේදී ව්‍යාජ අගයක් සහිතව එලෙස ක්‍රියාත්මක වේ.කුඩා සමාජය මහා සමාජයක් බවට පත් වීමේදී මෙම ව්‍යාජ අගය ඉතා වැදගත් භූමිකාවක් රඟ දක්වයි.මේ ව්‍යාජ අගය දැනුම සම්බන්ධව ක්‍රියාත්මක වන ආකාරය විමසා බලමු.කිසියම් දැනුමක් ඉගැන්වීමේදී මෙන්ම විභාග පැවැත්වීමේදී හා සහතික දීමේදී විශේෂ ප්‍රමිති පවත්වාගනිමින් එහි සැබෑ අගය ඉක්මවාලන ව්‍යාජ අගයක් ලබා දීම සිදුවේ.මේ ව්‍යාජ අගය බොහෝ විට මානසිකය.ව්‍යාපරවල කීර්තිනාමය යනු මේ ව්‍යාජ අගයේ ප්‍රකාශනයකි.

සීනිබෝලයක් වැනි දෙයකින් එක් ඒකකයකට ලැබෙන්නේ ඉතා සුළු මුදලකි.සීනිබෝල වැනි දේවල් වල එක් ඒකකයකින් ඉතා සුළු ලාභයක් ලැබෙන අතර එම ව්‍යාපාර කරන අය ලොකු ධනයක් උපයන්නේ මෙම ඒකක සංඛ්‍යාව විශාල නිසාය.එසේම ටියුෂන් පංති කර අති විශාල වශයෙන් මුදල් උපයන තැනැත්තා කිසිදු සූරාකෑමක් කර නැත.මෙහිදීද ඔහුගේ ධනය වැඩි වන්නේ ඒකක සංඛ්‍යාව වැඩි වීමමතය.ධනය පමනක් නොව වෙනත් ව්‍යුත්පන්නයන් උදෙසාද මෙම නියාමය සත්‍ය වේ.

සමාජ ව්‍යුහයේ විවිධ සංරචක ඇත.අන්ධයා අලියාගේ හැඩරුව කී ලෙස නොව සමස්තය දෙස බලන විට එක තැන ගල් ගැසුන සමාජ ව්‍යුහයක් වෙනුවට සංසරණය වන්නක් හදුනා ගත හැක.මෙවිට විවිධ සමාජ ඵලයන්ගේ හිමිකාරීත්වය විවිධ පුද්ගලයන් නිෂ්පාදන ක්‍රමවේදයට දක්වන දායකත්වය මත තීරණය විය හැක.

කුඩා ඒකක තුල ඒකක ලාභය වැනි දෙයක් තිබෙනවාට වඩා එය විස්තරනය වූ විට එහි ප්‍රබලත්වය වැඩිය.මෙය ධනයට පමනක් නොව සියල්ලටම පොදුය.බලය උදාහරනයකට ගනිමු.මෙයද වඩාත් ප්‍රචන්ඩ වන්නේ විස්තරනයේදීය.නමුත් ධනය ට වඩා බලය මහා සමාජය නිර්මාණය වීමේදී තීරණාත්මකය.කුඩා සමාජය විස්තරනය වීම අනිවාර්ය වන අතර එහිදී සිරස් සමාජ පිරමිඩය ගොඩ නැගීම ද අනිවාර්යය
මෙහි පීඩක පීඩිත පන්තියැයි දෙයක් නැත.එහෙත් එසේ පුද්ගලයන් සිටිය හැක.මේ කිසිවක් රේඛාවකින් වෙන් කර නිරන්තර ගැටුම්කරී කන්ඩායම් ලෙස විග්‍රහ කිරීමත් එම ගැටුම් තුලින් සමාජය ඉදිරියට වනවායැයි කීමත් මෝඩ කමකි.

සමාජය ඉදිරියට යන්නේ නිෂ්පාදන ක්‍රමවේදය වෙනස් වන නිසාය.එහිදී සමාජ පිරමිඩයේ හැඩය වෙනස් වේ.සමානාත්මත සමාජයක් ගොඩ නැගීමට කාට හෝ අවශ්‍ය නම් මෙම විස්තාරනය අඩු කළ යුතුය.එනම් සමාජය හැකිතාක් කුඩා හා සරල කළ යුතුය

මේ අරමුණ සඳහා කරන වෙනත් සෑම ප්‍රයත්නයකින්ම සිදුවන්නේ තත්වය තවත් නරක අතට හැරී තිබුනාටත් වඩා නරක සමාජයක් බිහි වීමය.
ඇත්තටම සාධාරණ සමාජයක් පතන්නේනම් කළ යුත්තේ කුමක්ද? පුද්ගල සුවිශේෂීතාවය මෙන්ම සමූහ සුවිශේෂීතාවයද ප්‍රතික්ෂේප කිරීමය.දේශපාලන පක්ෂය සමූහ සුවිශේෂීතවයට හොඳ උදාහරනයකි.කළ යුත්තේ උපරිම විමධ්‍යගතකරනයයි.එක් අයෙකුට යම් තනතුරක් දැරීමට යම් කාලසීමාවක් පනවමින් වැඩි දෙනෙකුට එම අවස්ථාව හිමි කර දීම එක් සාර්ථක ක්‍රමයකි.හැකි පමන විශේෂ ප්‍රාගුණ්‍යට එරෙහි විය යුතුය.පුද්ග්ල වෙනස්කම් එතරම් බලනොපාන්නේ සැබවින්ම තිබෙන්නේ ක්‍රියාවලියක් බැවින් පුද්ගලයාට තමන්ටම ආවේණික වූ අති සුවිශේෂ භූමිකාවක් නැති තරම් බැවිනි.

Sunday, March 2, 2014

තරඟෙට ළමයි හැඳීමෙන් වැඩක් වෙයිද?

බ්ලොග් අවකාශයේ අපූරු බ්ලොග් සමුදායක් වෙයි.Rear Gate ,A Serious Blog රැඩිකල් සටහන්.තහනම් වචන ,රැඩිකල් අදහස් ,Taboo Subjects , Sri Lanka Atheists  මේවායින් සමහරකි.

මේවාගේ අපූරු ලිපි පලවන අතර ඒවාගේ භාෂා ශෛලියද අපූරුය. මේ එක් බ්ලොග් එකක අපූරු ලිපියක් පළ විය.මේ දිනවල ෆේස්බුක් වල ශෙයා කරන්නේය කියන ලිපියක් එහි පළ කර තිබුනි. ජාතිවාදී පේජ් වලින් මුස්ලිම්වරු සමඟ තරඟයට ළමයි හදන ලෙස සිංහලයන්ගෙන් දිගින් දිගටම ඉල්ලීම් කරන අතර මේ ලිපිය එය විවේචනය කර තිබුණි. මේ ලිපිය පළ කළ ෆේස්බුක් පේජ් එක  ගැන යකාට පැහැදීමක් නැත. එය සිංහල බෞද්ධ විරෝධී ස්වරූපයක් පෙන්වයි.එය කිසියම් මුස්ලිම් පිරිසක් කරන එකක් වීමට ඉඩ ඇත.එසේ සිතන්නේ නොකර බැරිකමට මුස්ලිම්වරුන්ට චුට්ටක් එහෙමෙහෙ කියා සිංහලයා පතුරු අරින නිසාත් ජාතිවාදයට සම්බන්ධයක් නැති වෙනත් දේවල් පවා කියා අපහාස කරන නිසාත්ය. එය පසෙක තබමු. එහෙත් ඔවුන් කියන දේ ගැන පොඩ්ඩක් බලමු.

මුස්ලිම්වරු සමඟ තරඟයට දරුවන් හදන්න අපට පුළුවන්ද? එසේ කළ යුතුද? එසේ කිරීමෙන් සිදු වන යහපත අයහපත කුමක්ද කියා බලමු.මුස්ලිම්වරුන්ගේ ආගම සහ බුදු දහම අතර විශාල වෙනසක් ඇත.බුදු දහමේ පරම නිෂ්ටාව නිර්වනයයි. එය සාක්ෂාත් කර ගැනීමට ගිහි ගෙයින් නික්මී මහන දම් පිරිය යුතුය. ගිහියන්ගේ කාර්යභාරය එසේ මහන දම් පුරන උතුමන් නඩත්තු කිරීමයි. ඒ මිසක් ලෝකයම බෞද්ධ කිරීමක් වැනි දෙයක් එහි නැත. 

බුදු දහම ලොව පුරා පැතිරී ඇත්තේ අවිහිංසාවාදීවය. අශෝක රජු දහම් ප්‍රචාරය කළ අතර කනිෂ්ක රජු ගේ ධර්ම ප්‍රචාරය නිසා නැගෙනහිර ප්‍රදේශවල බුදු දහම පැතිරුනි. බුදු දහමේ නිදහස නිසා බුදු දහම ප්‍රදේශයෙන් ප්‍රදේශයට වෙනස් වෙයි. ලංකාවේ බුදු පිළිම වලට වඩා තායිලන්තයේ බුදු පිළිම හාත්පසින්ම වෙනස්ය.චීනයේ බුදු දහම ටා ඕ දහම සමඟ මිශ්‍ර වී ඇත.ජපානයේ එය ශින්ටෝ දහම හා මිශ්‍ර වී ඇත.එසේම ලෝක බෞද්ධ ජනතාව වශයෙන්ද එකමුතු බවක් නැත.තායි ලන්තයේ සංඝරාජ සම්ප්‍රදායක් තිබුනත් වෙන කිසිම රටක එවැනක් නැත.

මුස්ලිම් ආගම එසේ නොවේ.එහි ආගම වෙනුවෙන් යුධ වැදීම පවා අනුමතය.එහි නිර්මාතෲ නබි නායක තුමා සාර්ථක පවුල් ජීවිතයක් ගත කළ ආදර්ශවත් සැමියෙකි,පියෙකි.එසේම යුධ සෙනෙවියෙකි.එසේම ඉස්ලාමය යනු සම්පූර්න ජීවන පිළිවෙතකි.එහි කන බොන විදිය පමනක් නොව තවත් ඒවා කරන විදියද ඉගැන්වේ.මා යන මඟ විවාහ මඟයි ඉන් ඉවත් වන්නා මට අයත් නැතැයි නබි තුමා පැවසීය.අවිවාහකයන් ,දරුවන් නොහදන්නන් මුස්ලිම් සමාජයේ පිළිකුලට ලක් වේ. එසේම කාන්තාවන් පිටස්තරයන්ට ප්‍රදර්ශනය කිරීමක් නැත.බහු භාර්යා සේවනයද පිළිගනී.පල්ලියෙන්ම ඉඩම් මිළදී ගැනීම ,පවුල් පදිංචි කිරීම ට ධෛර්ය දෙයි. අපේ පන්සල් වල ලෝකය ගැන පිළිකුල් භාවනාව වැඩීමට උපදෙස් දෙන අතර මුස්ලිම් පල්ලිවල බිස්නස් කරන හැටි ඉගැන්වේ.

එසේම හාල්මැස්සන් කෑමට එරෙහිව නිර්මාංශ බණ කියද්දී මුස්ලිම්වරු හරක් මරන හැටි ඉගෙන ගනිති.එසේම ඕනෑම දුෂ්කර තත්වයකට ඔරොත්තු දෙන ලෙස මුස්ලිම් මනස සකස් කරද්දී බෞද්ධ මනස වනගත අපිස් දිවියකට හුරු කරවයි.අරක ප්‍රායෝගිකයි මේක එහෙම නෑ කීමට අපට අවශ්‍ය නැත.නමුත් මේ සමාජ මෙසේ දෙයාකාරය.

 මේ අවිහිංසාවාදී බුදු දහම ආරක්ෂා වීමට නම් රාජ්‍ය අනුග්‍රහයක් අවශ්‍යමය.ශ්‍රී ලංකාව දූපතක්ව තිබූ නිසා බුදු දහම ඉතිරි විය. තායිලන්තයේ බුදුදහම රැකුනේ අරට අධිරාජ්‍යවලට යටත් නොවූ බැවිනි.චීනයේ බුදු දහම මාක්ස්වාදීන් විසින් විනාශ කර දමා ඇථ.භූතානය ටිබෙටය වනි කඳුකර එදෙස් වල බුදු දහම රකුනි.බටහිර ආගමික නිදහස නිසා බටහිර රටවල ස්වල්ප දෙනෙක් බෞද්ධයන් වී තිබේ.

ඉස්ලාමය ලොව වේගයෙන් වර්ධනය වන ආගම ලෙස කියැවේ.ඒක ඇත්තද? නැත.අලුතෙන් ඉස්ලාමය වැළද ගන්නේ ඉතා සුළු පිරිසකි. ඉස්ලාමය වැඩෙන්නේ මුස්ලිම්වරු උපත් පාලනය නොකිරීම කියන සාධකය මතමය.මුස්ලිම්වරු උපත් පාලනය නොකරන්නේ ඇයි?ඔවුන්ට හැමදාම එසේ සිටිය හැකිද? 
 යැයි කියන එක් කාන්තාවක් සිය ජීවිත කාලය පුරා ලබන දරුවන් ගනන 2.1 ක් වුනොත් එය ජනගහනය ස්ථායී වීමට හේතුවේ.බංග්ලාදේශ් ,ඉරාන් වැනි රටවල ජනගහන වර්ධන වේගය ලංකාවේ මෙනි.නැත්නම් ඊටත් අඩුය.මුස්ලිම්වරු අතර වැඩි ජනගහන වේගයක් ඇත්තේ සවුදි අරාබිය,ක්වේට් ,නයිජීරියාව වැනි රටවලය. ලොව පුරාම බැලූ විට මුස්ලිම්වරුන්ගේ උපත් අනුපාතිකය වේගයෙන් පහළ යයි.ඊට හේතුව මුස්ලිම්වරුන් අතර අධ්‍යාපනය වැඩි දියුණු වීමත් මුස්ලිම් කාන්තාවන් වැඩිපුර රැකියාවල නියැලීමත්ය. ආර්ථික මට්ටම අනුව එක් පවුලකට ළමයි දෙන්නෙක් හදන එකත් අභියෝගයකි.

ඇත්ත තත්වය මෙසේ වුනත් පුංචි පවුල රත්තරන් වැඩ සටහනට සිංහලයන් ඇදී යාම නිසා සිංඅහලයන් වදවෙන බවත් මුස්ලිම්වරු වර්ධනය වන බවත් සයිබරය පුරා ප්‍රචාරය කෙරේ.මෙය ඇත්තද? ඇත්තෙනම පුංචි පවුල රත්තරන් වැඩ සටහන නිසා 1980 ගනන් වල උපන් සැළකියයුතු පිරිසකට සහෝදරයන් හෝ සහෝදරියන් නැත.අපේ ගමේ ප්‍රධාන වීදියට වැටෙන අපේ වීදියේත් ඊට සමාන්තර වීදි දෙකකත් මෙවැනි එක්දරු පවුල් 15 ක්ම ඇත.මේ කාලයේදී මුස්ලිම්වරු මේ වැඩසටහනට දායක නොවුනත් දැන් ඔවුන්ගේ පවුල් වලද ඉන්නේ ළමයි එක්කෙනෙකි දෙන්නෙකි.දැන් මුස්ලිම් කාන්තාවෝද රැකියා කරති.

ඇත්තටම තරඟෙට ජනගහනය වැඩි කරගෙන කිසිවෙකුට වැඩක් වෙයිද? නැත. ඉදිරියේදී තාක්ෂනය දියුණු වීමත් සමඟ මිනිස් ශ්‍රමය අනවශ්ය හෝ අවම  වෙමින් පවතී.මෙවැනි පසුබිමක ඉවක් බවක් නැතිව ළමයි හැදුවොත් විශාල රැකියා විරහිතයන් පිරිසක් බිහිකිරීමක් වනු අත.කැරළිකරුවන් හොරු ත්‍රස්තවාදීන් බිහි කිරීමක් වනු ඇත. ඔළුගෙඩි ගනනින් සංවර්ධනය මනින්න නොහැක.මානව සම්පත ගුනාත්මක විය යුතුය.ඉස්සර අපේ ගම්වල පවුල් වල ළමයි දහය පහලොව සිටියහ.ඒ ළමයි හදන්නේ බොහෝ විට අම්මා නොවේ අක්කලාය.එසේම ළමයි හැදෙන්නේද කැලේට කොලේටය.

වගකීමෙන් තොරව ළමයි හදන්නැයි උපදෙස් දෙන අය ඊට ආධාරද දෙන බව කියති.මෙය ප්‍රායෝගික නොවන බව පෙන්වා දෙමින් නිදහස් අදහස් බ්ලොග් එකට මම කොමෙන්ටුවක් දැම්මෙමි.ඒ මෙසේය.

ජාතික ප්‍රජනන තරඟය සහ ත්‍රස්තවාදය

අදාල ලිපියට දැමූ කොමෙන්ටුව

"මෙතන මෙහෙම ප්‍රශ්නයක් තිබෙනවා.මමත් දැක්ක සිංහල බෞද්ධ සංවිධානයක් ඔහොම මගුලක් ශෙයා කරනවා. මට නම් ප්‍රශ්නෙ තියෙන්නෙ ඔය සංවිධානෙ මාසයක් වත් තියෙයිද කියන එක . මුස්ලිම් කියන්නෙ සංවිධානාත්මක ආගමක්.ඒ ආගමෙන්ම ඒ ශික්ෂනය ඒ මිනිස්සුන්ට දීල තියෙනව.අවංකව හිතුවොත් ඒ ශික්ෂනය අපට නෑ.ඒ වෙනුවට තිබෙන්නෙ ඔක්කොම අත ඇරල කැලේට යමවු කියන චින්තනය .නියම බෞද්ධකම ඇතිව ඉන්නවනම් අනික් හැම මගුලම කරන්න වෙන්නෙ ගිල්ටි ෆීලින් ඇතිව. මොකද අනෙක් සියළුම වැඩ සංසාරෙ දිගු කරන නිසා.ඔය ආධාර වැඩෙන් වෙන්නෙ ආධාර දෙන අයයි ගන්න අයයි දෙගොල්ලගෙම සංසාරෙ දිගු වෙන එක.

මුස්ලිම් මිනිස්සු එහෙම නොවෙයි.ඒ අයගෙ ආගම යහපත් ලෞකික ජීවිතයක් අරමුණු කරගත් එකක්. මත්පැන් බීම තහනම් .ඒ වෙනුවට හරක් මස් කනව. අපේ එවුන් බීල වැටුනට පස්සෙ අරක  කරන්නවත් පුලුවන්කමක් නෑ.

ඒ වගේම මුස්ලිම් කෙල්ලො කොල්ලො ගෙදරට නාකි වෙන්න දෙන්නෙ නෑ. සිංහල කෙල්ලො බදින කොටත් 25 පැනල. 30 පනිනකම් ළමයි හදන්නෙ නෑ. හුඟ දෙනෙක් ඉගෙන ගෙන අරක මේක වෙලා 30 පැනල. සිංහලයට හෙනම හෙනහුරා වෙලා තිබෙන්නෙ ජ්‍යොතිෂය.මේක මේ ඉන්දියාවෙයි ලංකාවෙයි මිනිස්සුන්ට මහම කරදරයක්. මුස්ලිම් අයට ඒ මොනවත් නෑ. නාකි වෙලා බදින නිසා කොහොමටත් සිංහලයන්ට ළමයි හදන්න බෑ. සිංහල සමාජයේ අවිවාහකත්වය ලොකු ප්‍රශ්නාය්ක්.

අනික තමයි අද ආර්ථික තත්වය අනුව පිරිමිය විතරක් රස්සාව කරල අහ්‍රි යන්නෙ නෑ.පවුලෙ දෙන්නම රස්සාව කලත් අහ්‍රි අමාරුයි ජීවත් වෙන්න.එක ළමයෙක් හදන එකත් අමාරුයි.මුස්ලිම් පවුල් වලත් දැන් එක ළමයට දෙන්නට බැහැල.ඒ මිනිස්සුන්ටත් ආර්ථිකාය් අමාරුනෙ.

ඒ වගේම ඔය ආධාර ළමයි පස් දෙනෙකුට අවුරුදු 18 වෙනකම් දෙනව කියන එක සෙල්ලම් වැඩක්ද? නිකම් හිතල බලන්න ඔය ඉල්ලීමට හොඳ ප්‍රතිචාර ඇවිත් සැළකිය යුතු පිරිසක් ඔය වැඩේ කළා කියල .ඉතින් ඔය සල්ලි ගන්න මොකක්ද තිබෙන සහතිකය. ගනන් හදල බලන්න අඩු ගානෙ පවුල් ලක්ෂ 10 ක්වත් ඔය වැඩේට සමබන්ධ වුනොත් ඒ පවුල් වලට දෙන්න කොයි තරම් මුදලක් වෙන් කරන්න ඕනද කියල.ඕකට අරමුදල් තිබෙනවද? සල්ලිකාර පන්සල් තිබෙන බව ඇත්ත. ඒ හාමුදුරුවරු ඕවට සල්ලි දෙයිද?

ළමයි 5 දෙනෙක් ඉන්න පවුලකට එක ළමයට 5000 ගානෙවත් මාසෙකට දෙනවනම් මාසෙකට 25,000 ක් දෙන්න වෙනව .ඒ මුදල ප්‍රමානවත්ද? එක ළමයෙක් ඉස්කෝලෙකට දාන්න ආපදා ණය ගන්න වෙනව පිනාලට කප්පම් දෙන්න. එහෙමනම් ඒ වගෙ පවුලකට මාසෙකට ලක්ෂයක් වත් දෙන්න වෙනවා.

දෙන්නම ර්‍ඇකියාවලට යනකොට ඒ ළමයි හදන්න සල්ලි විතරක් මදි. ඒ ළමයි ඉස්කෝලවලට දාන්නෙ කොහොමද ? ලෙඩට දුකට බේත්.මුස්ලි අයට මේ ප්‍රශ්න නැත්තෙ ඒ අයගෙ සාමාජයීය සහයෝගීතාව නිසා.ඒක ඒ අයට ආගමෙන්ම ලැබුන දෙයක්. අපට එහෙම නෑනෙ. ඔය ඉමේජස් ශෙයා කරන එවුන් හෙට අනිද්දම පොලීසියෙන් කුදලගෙන ගිහාම සල්ලි බල්ලාගෙන ළමයි හදන්න ගිය දෙමාපියන්ට හුප්පෙ තමයි. හෙහෙ හෙහෙ